Quen somos

O Centro Interdisciplinario de Investigacións Feministas e de Estudos de Xénero (CIFEX), fundado en 2006, enmárcase no contexto dos centros propios da Universidade de Santiago de Compostela e conta co apoio expreso de institucións e organismos extra-universitarios considerados de interese político social. Os seus cometidos inclúen a investigación, a docencia e o asesoramento en materia de xénero dentro da USC e ao servizo da sociedade galega.

Información

Contacto

Facultade de Filoloxía
Avda. de Castelao, s/n. Campus Norte
15782 Santiago de Compostela

cifex@usc.gal

Directora: Teresa Moure
Coordinadora de Investigación: Eva Aguayo Lorenzo
Coordinadora de Docencia: Begoña Gómez Vázquez
Coordinadora de Asesoramento: Guadalupe Jiménez Esquinas
Coordinadora Campus de Lugo: Ana Cabana Iglesia

Integrantes

Yolanda Martínez Suárez

Licenciada en Xornalismo e Doutora en Filosofía, é profesora na área de Filosofía Moral e Política da USC. Forma parte do grupo de investigación Xustiza e Igualdade (POLIS-USC) e do equipo do proxecto I+D Reproducción biológica, reproducción social y esfera pública (REPRODUCE). Imparte docencia nos Graos de Filosofía e Biotecnoloxía, no Mestrado de Igualdade e no de Filosofía, que actualmente coordina. As súas liñas de investigación xiran en torno aos suxeitos emerxentes, a cidadanía, a xustiza e a igualdade.
Luzia Oca

Profesora axudante doutora de Antropoloxía Social na USC, foi profesora auxiliar na Univ. de Trás-os-Montes e Alto Douro (2004-2022). A súas liñas de investigación céntrase en xénero e migracións, xénero e turismo e nos coidados transnacionais. Coordinou diversos proxectos de intervención social, aplicando métodos participativos con perspectiva feminista, en Galiza e Cabo Verde, onde tamén participou en investigacións en cooperación ao desenvolvemento.
Enrique Latorre Ruiz

Doutor en Filosofía da Ciencia pola USC, onde actualmente traballa como docente do departamento de Filosofía e Antropoloxía compaxinando esta tarefa coa investigación no grupo de tecnoloxía educativa Tecnoeduc. Os seus intereses céntranse nos estudos feministas da ciencia e a tecnoloxía, as epistemoloxías feministas e queer-crip e a filosofía da medicina.
Natalia Paleo Mosquera

Profesora axudante doutora do Departamento de Ciencia Política e Socioloxía da USC, forma parte do grupo de investigación Armela. As súas liñas de investigación principais consisten na análise das políticas públicas de xénero, as políticas sociais, a participación das mulleres e o pensamento feminista. Na súa traxectoria profesional destaca tamén a experiencia directa no deseño de políticas de xénero en varias administracións públicas, como a Generalitat de Catalunya, a Deputación de Barcelona, o Concello de Granollers ou o de Santiago de Compostela.
Pablo Soto Casas

Mestrado en Igualdade, Xénero e Educación, é actualmente doutorando na USC. Na súa tese de doutoramento céntrase en como se constrúen as identidades de xénero a través das interacción sociais na vida diaria e como estas se elaboran xunto aos produtos culturais. Actualmente traballa como Persoal de Apoio á Investigación (PAI) para o CIFEX.
Teresa Moure

Profesora Titular de Lingüística Xeral na USC. Integrante do CIFEX desde a súa fundación e docente no Mestrado de Igualdade, Xénero e Educación. As súas liñas de investigación inclúen a epistemoloxía con perspectiva de xénero e a sociolingüística (eco)feminista. Premio á Introdución na perspectiva de xénero na docencia (2020) e na Investigación (2021). Desenvolve tamén un labor literario (que a crítica cualifica como voz feminista) polo que obtivo diferentes premios e as súas obras están traducidas a varias linguas. Dirixe o CIFEX desde 2022.
Alicia Villalba Sánchez

Doutora en Dereito, é Profesora na área de Dereito mercantil e do traballo da USC. Está integrada en dous proxectos de investigación do MINECO onde estuda a discriminación interseccional no acceso ao emprego e á formación profesional. Na súa traxectoria investigadora destacan os seus traballos relativos á protección das traballadoras embarazadas, á discriminación das traballadoras do fogar ou ao acoso no ámbito universitario.
Marta Pérez Pereiro

Profesora titular da Facultade de Ciencias da Comunicación da USC, onde imparte materias relacionadas coa produción cinematográfica e a cultura audiovisual contemporánea. As súas liñas de investigación son os pequenos cinemas, sobre todo o cinema galego, o xénero no cinema e o humor na comunicación. Actualmente é Delegada do reitor para a Igualdade.
Begoña Gómez Vázquez

Doutora en Socioloxía pola USC onde exerce como profesora do Departamento de Ciencia Política e Socioloxía. Secretaria da comisión académica do Mestrado en Igualdade, Xénero e Educación. Foi Coordinadora das catro edicións do Título Propio Mestrado en Educación, Xénero e Igualdade da USC, Membro da Comisión de Redacción do Programa de Doutoramento Educación, Xénero e Igualdade e Premio da USC á Introdución da Perspectiva de Xénero na Investigación (2011). A súa investigación céntrase nas relacións de xénero, procesos de socialización, medios de comunicación e cambio social. Forma parte do Consello do CIFEX.
Encina Calvo Iglesias

Profesora titular no Departamento de Física Aplicada da USC, é autora da Guía para unha docencia universitaria con perspectiva de xénero de Física (Xarxa Vives d’ Universitats). Premio á introdución da perspectiva de xénero na docencia da USC (2018) e na investigación (2022). Integrante do comité científico de congresos e xurados relacionados coa igualdade de xénero, pertence ao comité de Sabias da Cátedra de Feminismos 4.0 UVigo e ao grupo de traballo 4.2 do Observatorio Mujeres, Ciencia e innovación do MCI. Coordinadora do programa Unha enxeñeira ou científica en cada cole da USC.
Isabel Diz Otero

Profesora contratada doutora do Departamento de Ciencia Política e Socioloxía da USC, forma parte do grupo de investigación Rede Armela. A súas principais liñas de investigación abranguen os ámbitos dos parlamentos, as elites parlamentarias, a participación da muller e as políticas públicas de xénero. Foi a primeira coordinadora da Oficina de Igualdade de Xénero da USC.
Sara Calvete Lorenzo

Profesora na Facultade de Ciencias da Comunicación, como contratada predoutoral e IFP no Grupo de Estudos Audiovisuais onde está desenvolvendo a tese O Triplo Corte: como despedazar o corpo feminino na pantalla. É parte do Grupo de Innovación Docente COMVIRTINDO e do CIFEX, ambos os dous da USC.
Lorena Añón Loureiro

Profesora axudante doutora en Ciencias Sociais e do Comportamento USC. Conta con ampla experiencia docente en materias vinculadas aos feminismos e á identidade de xénero. Integrante do Grupo de Investigación Social e Políticas Públicas (ISOPOLIS) da USC e do Grupo de Estudos en Traballo Social, Investigación e Transferencia da UVigo A súa carreira investigadora está centrada en estudos sobre pornografía, prostitución e trata con fins de explotación sexual, políticas de inclusión social e procesos migratorios. Ten experiencia profesional como traballadora social en intervención con mulleres e violencia machista.
Rita Mª Radl Philipp

Profesora emérita na USC, onde foi catedrática de Socioloxía, forma parte do grupo de fundadoras do CIFEX e foi a súa directora entre 2006 e 2022. Foi tamén a primeira coordinadora do Mestrado Educación, Xénero e Igualdade da USC. Presidenta e fundadora do Comité de Investigación Nacional Socioloxía do Xénero da FES. Investigadora pioneira e profesora invitada en diversas universidades, é autora de múltiples publicacións, fundamentalmente sobre teoría e epistemoloxía feminista, violencia contra as mulleres e educación e roles de xénero.
Guadalupe Jiménez Esquinas

Profesora de Antropoloxía na USC. Doutora internacional pola UPV/EHU e Mestrado en Estudos de Xénero, o seu traballo enmárcase nos estudos críticos do patrimonio e céntrase na análise feminista dos procesos de patrimonialización. Premio Micaela Portilla á mellor tese sobre estudos feministas (2018), Premio da USC á Introdución da perspectiva de xénero na investigación (2017). Ademais da súa traxectoria académica, tamén é nai dende 2011. Forma parte do Consello do CIFEX.
Ana Cabana Iglesia

Profesora titular do Departamento de Historia. Membro do Grupo de Investigación de Referencia Competitiva Histagra e adscrita ao Centro de Investigación Interuniversitario das Paisaxes Atlánticas Culturais (CISPAC). Premio á introdución da perspectiva de xénero na investigación na USC (2023). A súa relación co estudo do xénero vén unido á historia rural sendo as mulleres do agro e a construción das súas feminidades ao longo do século XX o seu campo privilexiado de estudo. Forma parte do Consello do CIFEX.
Nélida Lamelas Castellanos

Profesora do Departamento de Economía Aplicada da USC. Docente no Mestrado de Igualdade Xénero e Educación, participou en congresos nacionais e internacionais e publicou artigos en revistas sobre temas docentes e desenvolvemento socioeconómico latinoamericano, desde a perspectiva de xénero. Obtivo recoñecemento en varias edicións dos Premios á introdución da perspectiva de xénero na docencia da USC.
Eva Cernadas García

Profesora titular da área de Ciencias da Computación e Intelixencia artificial e investigadora vinculada ao CiTIUS da USC. Ocúpase do deseño de novas técnicas de visión por computador e aprendizaxe automática para resolver problemas nos ámbitos da bioloxía, tecnoloxía dos alimentos ou medicina. Premio á introdución da perspectiva de xénero na docencia (2021). Participa na promoción da igualdade deseñando obradoiros para educación infantil e primaria ou promovendo o concurso INFORMATIZATE para estudantado non universitario.
Eva Aguayo Lorenzo

Profesora contratada doutora de Economía Cuantitativa da USC. Coordinadora do grupo de innovación docente GID-EBA. Foi coordinadora da Oficina de Igualdade de Xénero da USC entre 2012 e 2022. Coordinadora do grupo de traballo Docencia e formación con perspectiva de xénero na sectorial CRUE-Sostenibilidad (2018-20) e na rede estatal de unidades de igualdade universitarias RUIGEU (2021-22). Premio á Introdución da perspectiva de xénero na docencia da USC (2011). As súas liñas de investigación xiran ao redor da econometría aplicada, da economía de xénero e feminista e dos indicadores de xénero. Forma parte do Consello do CIFEX.
María Curros Espiño

Graduada en Educación Infantil con Mestrado en Igualdade, Xénero e Educación. Actualmente está a facer o doutoramento en Marketing Político, Actores e Institucións Contemporáneas cunha tese sobre a percepción da violencia dixital entre adolescentes
María Luciana Sánchez Iglesias

Licenciada en Socioloxía pola Universidad de Buenos Aires, Mestrado en Igualdade, Xénero e Educación pola USC é actualmente doutoranda do CIFEX, cunha tese sobre a organización dos coidados e percepcións das persoas coidadoras en Galiza.
aixa permuy

Profesora Axudante Doutora na Área de Métodos de Investigación e Diagnóstico en Educación do Departamento de Pedagoxía e Didáctica, interesada no desenvolvemento teórico-práctico da pedagoxía feminista e queer dos afectos, aplicada a: corporalidades e afectos; amor - vínculos - formas de organizarse afectivamente; coidados, benestar e convivencia; disidencias.
Milena Villar Varela

Profesora Axudante doutora do Departamento de Pedagoxía e Didáctica da USC. As súas principais liñas de investigación son as pedagoxías feministas e a coeducación; a pedagoxía feminista ecoanimal; as violencias de xénero 2.0; o acoso e as competencias emocionais docentes. Pertence ao Grupo galego de estudos para a formación e inserción laboral (GEFIL) e ao Seminario Permanente de Emocionalidade, Xéneros e Desenvolvemento Humano (EXDEHU).
María Jesús Souto Blanco

Doutora en Historia Contemporánea e profesora do Departamento de Historia da USC. As súas primeiras publicacións abordan o tema da represión franquista na provincia de Lugo. Dirixiu dous proxectos de investigación de financiación pública introducindo a perspectiva de xénero no tratamento da represión en varios ámbitos xurídicos, enfoque que orientou os seus últimos traballos.
Jorge García Marín

Profesor titular de Socioloxía da USC. Interesado en temáticas de xénero desde o comezo da súa traxectoria investigadora, participou na fundación do CIFEX e na implantación de materias de xénero nas titulacións de Maxisterio. Responsábel académico do único mestrado de xénero que existe actualmente no sistema universitario galego (Master en Igualdade, Xénero e Educación da USC), a súa investigación céntrase nas identidades masculinas e na análise dos medios de comunicación na conformación das identidades de xénero.
Josefa Mosteiro García

Profesora Contratada Doutora na USC. Integrante do CIFEX desde os seus inicios. Secretaria do Instituto de Ciencias da Educación da USC e da Asociación Interuniversitaria de Investigación en Pedagoxía (AIDIPE). Docente do Mestrado Universitario en Igualdade, Xénero e Educación da USC e de cursos dirixidos a fomentar o coñecemento en materia de igualdade de xénero. Autora de publicacións científicas sobre xénero e educación e investigadora en proxectos sobre xénero, educación e inserción laboral; violencia de xénero e xénero e ruralidade.
Beatriz Busto Miramontes

Doutora en antropoloxía social e cultural e profesora na Facultade de Filosofía da USC. Investigadora na Rede Galabra, o seu perfil céntrase na violencia executada sobre as mulleres a partir do estudo do folclore no franquismo e da arquitectura do estereotipo cultural da Galiza como dispositivo narrativo do poder patriarco-colonial. Por Um pais a la gallega. Galiza no NO-DO franquista obtivo o Premio Follas Novas do Libro Galego 2022. Premio á Introdución da Perspectiva de Xénero na Investigación (2022).
Ofelia Rey Castelao

Catedrática de Historia Moderna na USC. Ten dirixido vinte e catro teses de doutoramento e máis de vintecinco proxectos nacionais e internacionais. A súa nutrida investigación céntrase no campo de Historia das Mulleres no contexto galego. Premio Wonenburger (2011). Premio Nacional de Historia de España (2022) pola súa obra El vuelo corto. Mujeres y migraciones en la Edad Moderna.
Manuela Palacios

Profesora Titular de Filoloxía Inglesa na USC. Dirixiu seis proxectos de investigación sobre as escritoras galegas e irlandesas actuais financiados polo Ministerio de Ciencia e Innovación. A súa monografía Us & Them. Women Writers’ Discourses on Foreignness vén de ser publicada por Frank & Timme (Berlín 2023).
Alba Alonso Álvarez

Doutora en Políticas e Profesora do Departamento de Ciencia Política e Socioloxía da USC, é integrante do grupo de investigación Rede Armela. As súas principais liñas de investigación abordan o desenvolvemento das políticas de igualdade e o papel dos actores antifeministas. Ten publicado en revistas como Gender & Politics, European Journal of Women's Studies ou Social Politics.
Ana María Porto Castro

Doutora en Educación e licenciada en Psicoloxía, é profesora titular na USC. Directora do Instituto de Ciencias da Educación e Coordinadora do Programa de Doutoramento en Educación da USC. Forma parte do grupo de fundadoras do CIFEX. Autora de publicacións científicas sobre xénero e educación e investigadora en proxectos de carácter nacional, autonómico e local sobre xénero, educación e inserción laboral, violencia de xénero e xénero e ruralidade.